周黑鴨來港招股 年銷2萬噸滷鴨

小妹一向鍾意留意新股行情,因為近年唔少新股業務獨特,研究下佢地嘅招股書,往往發掘到唔少樂趣。黎緊有2隻新股周黑鴨(01458)同陸慶娛樂(08052),引起小妹注意。

周黑鴨係內地滷水鴨專門店,小妹不時北上出差,都聽聞過佢幾出名,不過就仲未試食過。佢呢個星期將就會公開招股,集資額最多33億銀,算係中型Size。

唔講唔知,原來內地人食滷水,食量都幾驚人。睇返招股資料,滷製品全國銷售總額,由2010年232億人仔,增長到2015年521億,預測到2020年更會升到1,235億人仔,果真滷水都食出一片天。

周黑鴨喺全國有828間自營門市,舊年嘅銷售額有24.3億人仔,增長約34%;銷售量多達2.7萬噸!!今年頭9個月已經賣左2萬噸滷鴨。其實一隻鴨都係十零廿斤重,唔知要劏幾多隻鴨先有2萬噸呢?

有一樣嘢小妹認為要值得留意嘅,係周黑鴨有成381間門店嘅租約,係會在一年內到期,要傾續租。萬一傾唔掂數或大幅加租,肯肯定會未來一年業績有好大影響。

食品企業最惹人關心嘅一定係食安問題,周黑鴨都曾經瀨過嘢。喺2013及14年,佢地在南昌、深圳及廣州的門店,都曾因食品細菌超標而被當地政府部門懲處。

除左呢隻鴨外,小妹留意到創業板又再有夜蒲股上市,就係小賭王何猷龍旗下新濠天地經營夜場Club Cubic的陸慶娛樂。

早兩年香港曾經有一隻夜蒲股上過市,就係Magnum(02080,現已改名奧克斯國際),佢係2014年初上市,創下超額認購3000倍紀錄,點知上市僅僅一年,大股東就係2015年賣盤,認真化學!

再睇吓陸慶娛樂嘅招股書,見到一個好熟嘅名字─李昇炫,為公司唯一基石投資者。咦?個名咁似我個OPPA嘅?無錯,佢就係風摩萬千少女的韓國天團BIGBANG嘅成員「勝利」。勝利出名愛蒲就係Fans都知,今次真係估佢唔倒,竟然做埋夜場股嘅基石投資者。

呢隻夜場股有「勝利」坐陣夠晒「Gimmick」,不過呢隻股以全配售形式,即係散戶「無得玩」,配售4.5億股新股,配售價介乎0.2至0.26元,每手10,000股,11月11日掛牌。既然買唔到,唯有等上市果日,會唔會請我OPPA嚟港交所敲下銅鑼。

撰文︰花生小姐MISSpeanut

發表迴響

你的電子郵件位址並不會被公開。 必要欄位標記為 *